Li vuci di l’omini
(A Leonida Répaci)
Quantu strati e paisi
e citati canusciu
e quantu treni
a scìnniri ed acchianari;
quantu facci di omini
di fimmini
di picciriddi chi salutanu,
e lu trenu chi passa
e li robbi stinnuti
li trizzi di l’agghia a la finestra.
Quantu strata
cu li peri ca dòlinu
qantu mpinciuti
supra sidili di petra
cu l’ammogghiu vicinu
a li carusi
ca passano a taliari
pi capiri cu sugnu.
Quantu notti e quantu voti
cuntari li picciuli
cu la manu
nni la sacchetta affunnata,
e l’umbri ‘i l’omini
e li porti nzirrati
e lu cori chi squagghia coma cira.
Quantu notti e quantu voti
dummanari un lettu,
projiri li carti
e ddà na femmina grassa ca fuma
cu li gammi a cavaddu
e mi ridi
arrunchiannu lu coddu;
e poi la càmmara scura,
lu tanfu di nchiusu,
lu lettu c’havi un patroni ogni sira
e li linzola ca fètinu
di carni stricati.
Quantu fumu nni sti càmmari
cu li pinzeri orbi
ca truzzano a li mura
e restano mpinnuliati a lu tettu.
Quantu fumu;
ed iu a vasarimi li manu,
ad abbrazzarimi
pi sintirimi strinciri,
a chiamarimi: Gnaziu, Gnaziu,
pi nun essiri sulu.
Quantu fumu,
e lu cori assuppatu
come muddica di pani vagnata.
Quantu notti
cu l’occhi cusuti e scusuti
e lu sonnu c’arriva a marusi
cu la forza d’un tàvaru.
Quantu notti e quantu fumu;
e poi l’arba
li primi fila di luci
lu ventu c’arrimina lu portali
lu cantu di l’aceddi,
li vuci di l’omini.
Ed iu mi susu
cu li vuci di l’omini.
(I. Buttitta, Li vuci di l’omini)